無論你有沒有目標或者夢想,現在可能已經忘記,但嘗試思考一下從前? 這麼多年來總會想過自己的夢想,非常具體地幻想出一幅又一幅的畫面,深深地印在腦海中,多年來沒有想過的夢想或理想,突然之間有人話比你知,原來我是可以的,還可以將目標想得更加大,更加遠......

大多數的人和我想的一樣,邊度有那麼容易呢? 其實想我的夢想是免費的,想完之後政府不會寄"夢想稅單"來通知你! 我試著去想像想像,從小到大到底有過什麼夢想在我的腦海裡,越想就越覺得可笑和可悲,以前十歲八歲的時候,原來一直夢想自己成為大人,今天已經實現了......

還有很多很多古怪的夢想,例如做警察,做律師,做工程師,做企業家之類,但到了今天又如何呢? 因為小時候沒有「付出心機學習」和「第一桶金」的理念,所以只有...想想想...想想想....到了我人生的二十個年頭,終於都親身體驗到工作的辛苦,現實環境令人埋沒了多年來的夢想,雖然成功的例子也不少,但世界上有一件很公平的事,就是每一個人的經歷都各有不同,如果全球五十四億人都經歷也一樣,我不敢想像會變成怎麼樣~

後記: 過去，大家都不覺得女人應有自己的事業。今天我相信我有之年內，美國會選出一位女總統。

一年好快就過去,每逢到了平安晚嘅時候,我個心總會覺得有點酸溜溜,今年也不會例外,原因唔再多講,想知就睇返之前嘅12月24日嘅blog啦! 先同大家講聲聖誕節快樂,因為我聽日就要上廣州過我的聖誕節了,因為公司响廣州搞左一個聖誕晚會,到時一定熱鬧非常,其實我都係第一年唔响廣州過聖誕節,講真我冇諗過自己有咁嘅今日,經常中港兩邊走,我慢慢感覺到自己嘅改變和成長,一點一點地累積......新嘅一年好快就會來臨,大家到時又會定下更多人生目標,一齊加油向前衝吧~

他們告訴我，處境無論多麼艱苦，一定要撐下去。

唔講唔知道,原來我父母同是台山人,到我廿七歲先至知道,真搞笑,突然之間解開了多年嚟嘅身世大秘密......原來我係個50%+50%嘅中國台山人,以前都冇咩機會問,其實只係自己冇心肝啫,一直以來都冇關心到自己嘅父母,身邊嘅朋友更加沒有,講來也有點後悔,點解當初自己會係一個內向怕羞嘅小男生,有時連半句說話都唔敢講,一見到女生就立即臉紅耳熱,如果可以早多十年變得活躍,咁而家一定會過得好開心,家人關係一定會好親密,朋友之間一定會好和諧,工作又會高興好多,人際關係又唔使搞到咁差......

不過後悔都沒辦法,從細個嘅性格就係咁,我慶幸有個咁好嘅黃金機會,比我有可以變好,今時今日我唔敢話我完全變哂,但最起碼我已經肯行出第一步,變得活躍,變得主動,變得多言,變得樂觀,變得成熟......多謝我的貴人~

後記: 我不希望被捧為聖人，只想後世視我為常人，有善也有惡。

自從轉型之後,我非常之開心,一個月好快就過去,我學到好多好多做人嘅道理,清楚理解到自己係個咩人,到底自己係個咩性格嘅人,同埋可以去睇穿對方嘅性格,對於人際關係起到好大嘅作用,得益不少!

今個月我已經開始發展國內市場,國內商機處處,唔怪之得所有人都要返國內發展,中國實在太過強,如果唔係身處於國內,大家跟本想像唔到祖國真係好強大,我嘅爸爸同媽媽都肯幫助我發展事業,我非常感激他們,我爸爸自從五年前退休之後,就返鄉下定居,所以識到一大班國內朋友,而對發展國內市場非常有幫助,總之人生一定要好好咁把握任何一個機會,錯過左就只有後悔一生,創業能夠搵到金錢,搵到快樂,搵到朋友,還有搵到自己~

後記: 莫言天國玄關窄，休歎人生道路難。千載遺芳千載臭，存乎一念是非間。

我其實唔係玩失蹤,只係開始我嘅創業之路而已,幫別人打工七年之後,突然一天感悟受僱於人,猶如養在籠裡的鳥兒,雖然不愁飲食,卻要每天唱別人的歌,不能高飛......

替別人打工,每天聽命於人,受人役使,無異於一隻住在籠中的雀仔,老闆月底發嘅一份糧,就係雀糧,與其每天唱別人要他們唱的歌,然後等待別人喂食雀糧,倒不如反客為主,我寧願自由飛翔,唱自己嘅歌,靠自己搵蟲食......

10月2日係我一生之中最重要嘅轉捩點,我得到一個千載難逢嘅黃金機會,就如此我正式發展屬於我嘅事業喇,其中一個最大嘅轉變,就係由一隻住在籠裡嘅小鳥,變成一隻天空海闊任我飛嘅大鵬鳥~

後記: 人一旦得不到正常人的待遇，就會失去鬥志；但要是得到支持，就會奮鬥下去。

尋晚去欣賞一部新上畫嘅電影--->強復者,係由演技派嘅女影后朱迪科士打主演,睇完之後簡直拍案叫絕,朱迪科士打教懂我咩叫做真正嘅演技,成套戲冇咩動作場面,一直都係交代女主角復仇嘅心路歷程,每一幕都令我如痴如醉,真係好犀利呀! 早响強復者未上畫之前,我已經知道朱迪科士打會有新戲上,起初都諗住試試睇,試睇一下一位女強人點樣去演活復仇人,到最後都冇令所有嘅支持者失望,直得令人再三回味,而最興奮嘅就係女主角得到探員嘅幫助,最後都能夠成功復仇,雖然呢個結局有D搞笑,但真係好好好......好正~

後記: 不要敵視社會上大部分人的信仰，基督教、印度教、回教都一樣。尊重別人的信仰十分重要，不管你自己信不信神。

話都冇咁快就過完十.一黃金日,今日真係好熱,應該係大運動日至真,不過又係自己衰,之前去左游水,之後又再走去踢波,搞到身體又再一次痛爆喇! 眼見咁好天氣嘅一日假期,竟然要留返响屋企休養,真係有D食唔安坐唔樂嘅感覺,無聊無聊上去Yahoo拍賣睇睇,今次主力睇男裝衫褲,睇吓睇吓最終都忍唔到手......買了,因為今次睇到件長袖白裇衫,個款真係未見過,又平喎,而家等緊賣家回覆有冇貨,一有就即買,之前响Yahoo拍賣試過幾次,所以有一定嘅信心保證,好期待收貨之後嘅一刻呀~

後記: 你怎樣對待人家，人家也會怎樣待你。你以暴力加諸人，他們也會以暴力相對待。

九月最後一日竟然係星期日,安排得真係好好呀,起碼知道星期一唔使返工,感覺點都係唔同,星期日係我法定嘅完全休息日,即係只會休息或者做自己想做嘅嘢,所以今日過得唔錯,加上天氣好又可以落街練波,出完一身汗之後,返屋企沖個涼食個包,跟住打機玩返夠本先......時光飛逝......話咁快就三點三Tea-time又到喇,今次只係食杯雪糕就算數,之前餐飯食得好飽! 突然又想去游水,因為天氣好到加零七,齋曬太陽都正啦,不過今朝踢完波已經成身散晒,最後都係打消呢個念頭,唯有歸家繼續打機啦~

後記: 發掘夢的力量，真正祕訣在於放開自己，讓夢牽著你走，別因遇到難以解釋的信息或做了惡夢而逃避。

放工之後即刻去左游水,感覺勁正,因為今次係去觀塘游泳池,一個我從未去過嘅游泳,今日人唔算多所以水比較清澈,而太陽仲好開心咁照住我呢! 經過一輪猛烈嘅蛙式之後,係時候休息休息,順手曬曬太陽,不過唔知點解總係曬唔到古銅色,好可惜天生係比較白,曬左咁多次都只係黑左少少......唔多覺唔多覺咁! 游到五點鐘就走人喇,之後當然係火速返屋企食飯啦,因為我連午飯都冇食就去游水,游水之前都唔覺得肚餓,但係游完之後竟然覺得勁餓,就係咁一個非常之充實嘅星期六就玩完喇~

後記: 了解夢中那些具創意的形象和意念，能增強你解決問題的能力。

越來越討厭公司嘅阿雞經理,佢真係串爆喎......今日幾經辛苦將份Glass Wall圖完成,由起初第一次submission嘅十幾張圖,一下就爆出三十九張圖,一份真真正正嘅Glass Wall 2nd submission就完成喇,係我少有嘅佳作之一,份圖足足花上一個月有多嘅時間先至完成,今日終於都可以出圖做submission,但係出圖之前一定要先過阿雞經理嘅一關,如果過唔到呢個難關的話,就又要再一次打回頭,最終又再一次令我失敗而回,份圖又比條友大屠殺了......今次仲要係死傷冇數,非常之咁攞命,傾完成個人都冇晒心機啦,仲邊度有心情去改圖呀,之後仲要比多一份tender我畫,臨放假前搞單咁嘅嘢,唔認命都唔得啦~

後記: 即使你是廚師、養魚的人，你在這工作上找到快樂，便會因此喜歡自己，並被別人喜歡。

勁眼瞓呀,一返到公司就勁想瞓覺,咩精神都提唔起,對超級熊貓火眼簡直出賣晒我,係人見到我都知道我係熊貓寶寶,不過我都唔想咁,之但係我實在愛莫能助,唔夠瞓就梗係會有熊貓火眼,其實尋晚我已經十點半就瞓覺覺豬,不過好似幫助唔大,睇嚟今晚都要早些少瞓先得喇! 話時話其實我心理上,仲依然覺得自己仲放緊假咁樣,而生理上就冇得選擇,工就一定一定要返,工就一定一定要繼續,絕對冇任何選擇,除非要我豪比公司啦,唔返一日工囉......不過我又過唔到自己個關,唔撈一日真係唔見好多(唔怕講)~

後記: 要去想、要去相信、要去做。很認真地想，努力地想，想像最美好的事，然後相信自己一定會做到，然後找方法去實踐。

先祝我個細妹926生日快樂,佢一定係玩得好開心啦,直頭好似唔見左人咁,想講句生日快樂都唔得,不過我已經留言比佢,希望佢有收到就好喇,雖然今年冇禮物送比佢,但心意就一定係唔少得嘅!

中秋節話都冇咁快就玩完,感覺太快喇,或者只係尋晚玩通頂,所以感覺上過得勁快,尋晚好好彩可以幾個屯門之友一齊玩,又可以一齊飲酒,今個中秋雖然過得快,但係就過得好有意思,總之玩得好開心啦~

後記: 事業可以由自己規劃、掌控，但生命給你的習題作業卻無時間表。

今晚公司冇得放早,其實已經一早預左,因為聽d同事講過話,上一年中秋節都冇得早收工,所以都唔多抱太大嘅希望,一如以往做到六點就即刻收工走人,不過我就選擇留多半個鐘頭睇定d先,如果唔係呢,同一時間太多人走就會大塞車,我嘅決定係正確嘅,等到人潮散晒之後,一個人輕輕鬆鬆咁回家去,不過出到去德福商場就唔同晒喇,人勁多,唔知點解咁多人去九龍灣&黃大仙一帶,搞到大塞車,好在我返屯門係相反方向,冇事回家去! 天公最終都係做美,向天一望一大個圓圓月亮在天掛,今年嘅月光真美呀~

後記: 作品是否經得起時間考驗，內容本身固然重要，但在這個時代，大家選擇多了，價值觀變得多元，在媒體刺激下變得重口味，變化快。

咁難得九月尾打風,點知又食炸糊,冇假放已經不在話下,而家嘅天氣仲差成咁,一係就唔好嚟啦,搞到臨到中秋先至嚟,個天今晚烏雲密佈,連個又圓又大嘅月光都睇唔到,初十四應該都差唔多係月圓時份,真掃興呀......如果聽日十五都仲係咁就'P'佢個'K'喇,中秋缺月好似唔多利是咁,話到明中秋節係人月兩團圓嘛,點能夠只有人而無月呢~

後記: 一定要相信自己找到真愛，人要學習「微軟精神」，如果你確定這條路是你要的，就給自己時間、階段。

跳過左三日嘅日記,終於都玩完回歸喇!

星期四本來約左個女仔去尖沙咀食飯,我係好辛苦先約到佢出嚟,可惜佢事先又唔同我講話要去睇戲,到我加完班八點幾,之後就飛身出去尖沙咀,到我到左就話仲睇緊戲,咁我唯有等等條女啦,等左半個鐘頭之後都係算把啦,帶住一種被耍嘅心情獨自回家去,戇膠膠嘅一晚咁樣就過去喇......

星期五又係開波日,之前一早已經book定好球場,預左夜晚一定會好夜先返得到屋企,同上次一樣,準時收工,一大班同事拉大隊鬆人,同樣好準時咁六點鐘就正式開波,踢完波十幾人當然係一齊去食餐晚飯啦,開開心心嘅一晚咁樣就過去喇......

星期六終於都被蒲友拉上大陸happy,不過出發之前當然要等收工先啦,話晒都仲有半日工要挨,四點零鐘等齊人就出發,輕輕鬆鬆嘅一晚咁樣就過去喇~

後記: 企業跟愛情很像，今天沒有一個企業會因為你離開而垮掉，即使你了不起當到總裁也一樣。愛情也是，你不要想對方沒有你會怎樣，如果對方真會怎樣，是對方的問題；不然就是你倆在經營這段感情時太過封閉。